హైదరాబాద్: టాలీవుడ్ డార్లింగ్, గ్లోబల్ స్టార్ ప్రభాస్ అభిమానులను కలవరపెట్టే వార్త ఒకటి సోషల్ మీడియాలో వైరల్ అవుతోంది. ప్రస్తుతం వరుస పాన్ ఇండియా ప్రాజెక్టులతో ఫుల్ బిజీగా ఉన్న ప్రభాస్, షూటింగ్ సమయంలో గాయపడినట్లు సమాచారం. హను రాఘవపూడి దర్శకత్వంలో తెరకెక్కుతున్న భారీ బడ్జెట్ చిత్రం ‘ఫౌజీ’ (Fauji) షూటింగ్లో ఈ ప్రమాదం చోటుచేసుకున్నట్లు తెలుస్తోంది.
గుర్రపు స్వారీ చేస్తూ..
విశ్వసనీయ వర్గాల సమాచారం ప్రకారం.. ఈ సినిమాలోని ఒక కీలకమైన యాక్షన్ సీక్వెన్స్ కోసం ప్రభాస్ గుర్రపు స్వారీ (Horse Riding) చేస్తుండగా అదుపు తప్పి కింద పడిపోయారట. ఈ క్రమంలో ఆయన చేతులకు స్వల్ప గాయాలైనట్లు సమాచారం. వెంటనే స్పందించిన చిత్ర యూనిట్ సెట్స్లోనే ఆయనకు ప్రథమ చికిత్స అందించారు.
ఆందోళన వద్దు.. రెండు రోజుల్లో మళ్ళీ సెట్స్లోకి!
ప్రభాస్కు తగిలిన గాయాలు పెద్దవి కాకపోవడంతో అభిమానులు ఊపిరి పీల్చుకుంటున్నారు. వైద్యులు ఆయనకు రెండు రోజుల పాటు పూర్తి విశ్రాంతి తీసుకోవాలని సూచించినట్లు టాక్. విశ్రాంతి అనంతరం ప్రభాస్ మళ్ళీ షూటింగ్లో పాల్గొననున్నారు. ఈ ఏడాది సంక్రాంతికి ‘రాజా సాబ్’తో సందడి చేసిన రెబల్ స్టార్, ఇప్పుడు ‘ఫౌజీ’ని కూడా అంతే వేగంగా పూర్తి చేయాలని కంకణం కట్టుకున్నారు.
సందీప్ రెడ్డి వంగా ‘స్పిరిట్’ కంటే ముందే ఈ పీరియాడిక్ వార్ డ్రామాను ప్రేక్షకుల ముందుకు తీసుకురావాలనే పట్టుదలతో ప్రభాస్ విరామం లేకుండా శ్రమిస్తున్నారు. డార్లింగ్ త్వరగా కోలుకోవాలని సోషల్ మీడియా వేదికగా ఫ్యాన్స్ పోస్టులు పెడుతున్నారు.
