Good news for Amaravati farmers.. Allotment of plots to those who were given lands today..!

అమరావతి రైతులకు గుడ్‌న్యూస్.. భూములిచ్చిన వారికి ప్లాట్ల కేటాయింపు ఆరోజే..!

అమరావతి రాజధాని కోసం భూములు ఇచ్చిన రైతులకు ఏపీ ప్రభుత్వం శుభవార్త చెప్పింది. రాజధానిలో ప్రతిష్టాత్మక సీడ్ యాక్సిస్ రోడ్డు నిర్మాణానికి భూములిచ్చిన రైతులకు.. మలి విడత ప్లాట్ల కేటాయింపు ఈ నెల 29న జరగనుంది. రైతులకు పారదర్శక ఈ-లాటరీ విధానంలో స్థలాలను కేటాయించనున్నారు. కాగా, కూటమి ప్రభుత్వం అధికారంలోకి వచ్చాక.. పెండింగ్‌లో ఉన్న ప్లాట్ల కేటాయింపు ప్రక్రియను వేగవంతం చేసిన విషయం తెలిసిందే. ఇటీవల కూడా 200పైగా రైతులకు ప్లాట్లు కేటాయించింది ప్రభుత్వ

• అమరావతి రైతులకు గుడ్‌న్యూస్
• భూములిచ్చిన వారికి ప్లాట్ల కేటాయింపు ఆరోజే
• ఈ- లాటరీ విధానంలో ప్లాట్ల కేటాయింపు

అమరావతి రాజధాని కోసం భూములు ఇచ్చిన రైతులకు ప్రభుత్వం శుభవార్త చెప్పింది. రాజధాని నగరంలో ప్రతిష్టాత్మకంగా చేపట్టిన సీడ్ యాక్సిస్ రోడ్డు నిర్మాణానికి భూములు ఇచ్చిన రైతులకు ప్లాట్ల కేటాయింపు ప్రక్రియను ఏపీ క్యాపిటల్ రీజియన్ డెవలప్‌మెంట్ అథారిటీ (APCRDA) వేగవంతం చేసింది. మలి విడత ప్లాట్ల కేటాయింపును ఈ నెల 29న చేపట్టనున్నట్లు తెలిపింది. ఇటీవల కూడా 200పైగా మంది రైతులకు ఈ- లాటరీ విధానం ద్వారా ప్లాట్లు కేటాయించిన విషయం తెలిసిందే.

కాగా, ఈ మలి విడత ప్లాట్ల కేటాయింపు ఈ నెల 28వ తేదీనే చేపట్టాల్సి ఉండేది. కానీ కొన్ని అనివార్య కారణాల వల్ల కార్యక్రమాన్ని ఒక రోజు వాయిదా వేశారు అధికారులు. దీంతో ఈ నెల 29వ తేదీన ప్లాట్ల కేటాయింపు ప్రక్రియను నిర్వహించాలని నిర్ణయించారు. సీడ్ యాక్సిస్ రోడ్డు కోసం భూములిచ్చిన రైతులకు పారదర్శకంగా ఉండే ఈ-లాటరీ విధానం ద్వారా స్థలాలను కేటాయించనున్నారు. ప్లాట్ల కేటాయింపుకు సంబంధించి.. సీఆర్డీఏ ఇప్పటికే ఏర్పాట్లు పూర్తి చేసినట్లు అధికారులు తెలిపారు.

కాగా, ఉండవల్లిలో జరీబు భూములిచ్చిన రైతులకు జనవరి 30న స్థలాలు కేటాయించబోతున్నట్లు వార్తలు వచ్చాయి. మరి ఆ రైతులకు ఎప్పుడు భూములిస్తారనే విషయంపై స్పష్టత లేదు. మరోవైపు, ఈ ప్లాట్ల కేటాయింపు పూర్తైన వెంటనే రైతులకు ప్రొవిజనల్ సర్టిఫికెట్లు అందజేయనున్నారు అధికారులు. రిజిస్ట్రేషన్ ప్రక్రియను కూడా త్వరితగతిన పూర్తి చేయాలని మంత్రి నారాయణ అధికారులను ఆదేశించినట్లు తెలిసింది.

కాగా, 2024లో కూటమి ప్రభుత్వం అధికారంలోకి వచ్చాక పెండింగ్‌లో ఉన్న రాజధాని రైతుల ప్లాట్ల కేటాయింపు ప్రక్రియను వేగవంతం చేసింది. ఉండవల్లి గ్రామంలో మెట్ట భూములిచ్చిన 200పైగా మంది రైతులకు.. ఇటీవల 390 స్థలాలు కేటాయించారు. అంతేకాకుండా మరో 14 గ్రామాలకు చెందిన 90 మంది రైతులకు 135 స్థలాల్ని సీఆర్డీఏ కేటాయించింది.

రాజధాని కోసం తొలి దశలో భూములు ఇచ్చిన 29 గ్రామాల పరిధిలోని రైతులకు ప్రస్తుతం ప్రభుత్వం ప్లాట్ల కేటాయింపులు జరుపుతోంది. ఇప్పటివరకు రాజధాని కోసం భూములు ఇచ్చిన 29,233 మంది రైతులకు 69,421 స్థలాలు కేటాయించింది. ఇందులో 2019కి ముందు.. 27,323 మంది రైతులకు 62,718 స్థలాలు కేటాయించింది. కూటమి ప్రభుత్వం అధికారంలోకి వచ్చాక.. 1,366 మంది రైతులకు 6,703 ప్లాట్లు ఇచ్చింది. 2019కి ముందు రూపొందించిన నిబంధనల ప్రకారమే భూ కేటాయింపులు జరుపుతున్నారు. ఆయా గ్రామాల రైతులకు వారి గ్రామ సమీపంలోని లేఅవుట్లలోనే ప్లాట్లు కేటాయిస్తోంది ప్రభుత్వం.